تو کرامت سر تا پا اے سیّد و سُلطانِ دِیں ﷺ
مَیں ندامت سر تا پا اے سیّد و سُلطانِ دِیں ﷺ
چارہ گر میرے پیمبرﷺ تُو نہ ہو تو کون ہے؟
چارۂِ بےچارگاں اے سیّد و سُلطانِ دِیں
اِس جہاں میں اُس جہاں میں نور تیرا جلوہ گر
نور سے بھرپور تُو اے سیّد و سُلطانِ دِیں ﷺ
رات تیرے گیسوؤں کی خوشبوؤں کی محتاج
صبح تیری مسکراہٹ اے سیّد و سُلطانِ دِیں ﷺ
چاند کی کرنیں تیرے رخ کی ضیاء سے شرمسار
ماہِ کامِل ہاشمی اے سیّد و سُلطانِ دِیں ﷺ
کس قدر ہے تو کریم اللہ نے تجھ کو کہہ دیا
رحمت اللعالمیں اے سیّد و سُلطانِ دِیں ﷺ
ہے تماشائی جہاں مجھ سی مریضِ شوق کا
چشمِ رحمت ہے دوا اے سیّد و سُلطانِ دِیں ﷺ
مجھ سی عاصی کو ہے بس تیرا سہارا مصطفیٰ ﷺ
ناز ہے مجھ کو یہی اے سیّد و سُلطانِ دِیں ﷺ
چشمِ سائم آنسوؤں کے رُوپ میں ہے نعت گو
یہ بھی تیرا ہے کرم اے سیّد و سُلطانِ دِیں ﷺ