اشک آنکھوں سے کچھ بہائے ہیں
ہم ترا شہر چھوڑ آئے ہیں
دل کی نگری میں درد کے جگنو
تیری یادوں سے جگمگائے ہیں
آسماں پر تمہارے آنے سے
چاند تارے بھی جھلملائے ہیں
میری آنکھوں میں دیکھ کر آنسو
ٹھیک ہے، آپ مسکرائے ہیں
تجھ کو دیکھا تو خوش ہوئی لیکن
زخم دل پر بھی کچھ لگائے ہیں
میں نے کچھ خواب کے جزیروں پر
تیری یادوں کے گھر بسانے ہیں
سائمؔ ہم نے وفا کی راہوں میں
کتنے پتھر بھی آزمائے ہیں
………………………………………………………………………
ظرف کیسا بلا کا لائے ہیں
رند پی کر نہ ڈگمگائے ہیں
تیری چاہت کی ایک بارش نے
پھول من میں کئی کھلائے ہیں
یاد تیری کے نرم جھونکوں نے
کتنے ارمان پھر جگائے ہیں
ہم نے تنہائیوں کے عالم میں
خواب پلکوں پہ خود سجائے ہیں
لوگ کہتے ہیں ہم بدلتے ہیں
راز اس نے ہی کچھ چھپائے ہیں
نقش دل کے نفیس کاغذ پر
صرف ہم نے ترے بنائے ہیں
ساتھ سائم تمہارے ٹھنڈک تھی
اب تو ظلمت کے سر پہ سائے ہیں
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جن کی خاطر سکوں گنوائے ہیں
جو تھے اپنے ہوئے پرائے ہیں
ہائے ارمان کچھ غریبوں کے
دل کی قبروں میں ہی چلائے ہیں
میں نے پلکوں پہ اشک کی صورت
ہجر کے کچھ دیے جلائے ہیں
میں ہوں غمگیں سدا سہاگن سی
گیت سب بھیروی میں گائے ہیں
جو ابھی تک ہیں ہم سفر میرے
صرف وہ شخص مجھ کو بھائے ہیں
کوئی شکوہ نہیں ہے غیروں پر
ظلم اپنوں نے مجھ پہ ڈھائے ہیں
نین اپنے تمہاری راہوں میں
رو کے سائم نے ہی بچھائے ہیں